ابیات سلطان باہو رح

ابیات سماعت فرمائیں – اقبال باہو کی آواز میں

کتاب برائے تشریحات: ابیاتِ باہو

اردو میں ابیات کی تشریح

الف اللہ چنبے دی بوٹی میرے من وچ مرشد لائی ہو
نفی اثبات دا پانی ملیس ہر رگے ہرجائی ہو
اندر بوٹی مشک مچایا جاں پھلاں تے آئی ہو
جیوے مرشد کامل باہو جیں اے بوٹی لائی ہو

اے تَن میرا چشماں ہووے تے میں مرشد ویکھ ناں رجاں ہو
لوں لوں تے مڈ لکھ لکھ چشماں ہِک کھولاں ہِک کجّاں ہو
اتنیاں ڈٹھیاں صبر نہ آوے ہور کتے ول بھجاں ہو
مرشد دا دیدار ہے باہو، مینوں لکھ کروڑاں حجاں ہو

بغداد شہر دی کیا نشانی اچیاں لمیاں چیراں ہو
تَن مَن میرا پُرزے پُرزے جیوں درزی دیاں لیراں ہو
انہاں لیراں دی گل کفنی پا کے رَلساں سَنگ فقیراں ہو
بغداد شہر دے ٹکڑے منگساں باہو کرساں میراں میراں ہو

پنجے محل پنجاں وچ چانن دیوا کِت ول دھرئیے ہو
پنجے مہر پنجے پٹواری حاصل کِت ول بھریے ہو
پنجے امام تے پنجے قبلے سجدہ کِت ول کریے ہو
باہو جے صاحب سر منگے ہر گز ڈھِل نہ کریے ہو

ثابت صدق تے قدم اگیرے تائیں رب لبھیںوے ہو
لوں لوں دے وچ ذکر اللہ دا ہر دم پیا پڑھیوے ہو
ظاہر باطن عین عیانی ہو ہو پیا سنیں وے ہو
نام فقیر تِنہاں دا باہو قبر جنہاں دی جیوے ہو

جو دم غافل سو دم کافر سانوں مرشد اے پڑھایا ہو
سنیا سخن گئیاں کھل اکھیں اساں چت مولا ول لایا ہو
کیتی جان حوالے رب دے اَساں ایسا عشق کمایا ہو
مرن توں اَگے مر گئے باہو تاں مطلب نوں پایا ہو

چڑھ چناں تے کر روشنائی ذکر کریندے تارے ہو
گلیاں دے وچ پھرن نما نے لعلاں دے ونجارے ہو
شالا مسافر کوئی نہ تھیوے ککھ جنھاں تھیں بھارے ہو
تاڑی مار اُڈا نہ باہو اساں آپے اُڈن ہارے ہو

دل دریا سمندروں ڈونگھے کون دلاں دیاں جانے ہو
و چے بیڑے و چے جھیڑے و چے ونجھ مہا نے ہو
چودہ طبق د لے دے اندر تنبو وانگن تا نے ہو
جو دل دا محرم ہووے باہو سوئیو رب پچھا نے ہو

سن فریاد پیراں دیاں پیراں میں آکھ سناواں کینوں ہو
تیرے جیا مینوں ہور نہ کوئی میں جیاں لکھ تینوں ہو